EXPOSITIO TEXTUS.

Littera sic exponitur : Dicimus autem. solvendo ad praedicta, quia est, id est, contingit, invenire eas actiones aliorum symbolorum, id est, signorum sacramentalium, participationem consummationem, id est, consummatam participationem finis, ex divinis et perfectivis donis istius, scilicet Eucharistiae, exire, quae confertur in hoc sacramento. Enim, id est, quia fere, hoc dicitur propter sacramenta quae non sunt tantum, sacramenta, sed etiam officia. Vel melius quia de illis non est intentio in libro isto, quia non distinguit per hoc inter sacramenta, sed inter diversas perfectiones sacramentorum secundum conjunctionem ad ultimum finem, vel secundum effectum proprium, ut dictum est, non inest, id est, non contingit quamdam, id est, ullam, hierarchicam teletam perfici, nisi sacrifido divinissimae Eucharistiae perficiente ,

id est, sacrificii collectionem, id est, reductionem in unum perficiendorum, id est, eorum quae perficiuntur per singula sacramenta, perficiente, dico, consummatione ad unum, id est, adunando fini : et sacrificio, dico, perficiente communionem ipsius per sacramenta ad Dominum, et hoc donatione perfectivorum mysteriorum, id est, symbolorum quae significant communionem, et per se causant, tradita, id est, instituta a Deo.Si ergo unaquaeque de numero hierarchicarum teletarum dum sit imperfecta, non perficiet nostram communionem et synaxim, id est, congregationem ad unum, et est teleta, id est, necesse est esse propter hoc quamdam teletam, propter quod dedicat, id est, consecrat perfectissimum, id est, ad hoc ut in fine perfectionis constituat: autem, id est, sed, haec traditio divinorum mysteriorum, id est, symbolorum quae ipsum Deum continent, perfectio per alia sacramenta, est finis et caput, id est, summa totius hierarchicae actionis : si, inquam, ita est, merito, id est, rationabiliter, invenit ei propriam cognominationem ex veritate actionum, id est, ex eo quod vere et perfecte facit, vocando eam communionem.

Sic et nos laudamus sacram teletam divinae generationis, id est, baptisma per nominationem illuminationis, sic enim in Graeco nominatur, ut supra dictum est secundo capite : veram ex perfecto, id est, quae vere sibi competit ex eo quod facit, quoniam scilicet tradit primum lumen fidei, et est principium omnium divinarum introductionum, id est, actionum ducentium in lumen divinum, ut dictum est. Siquidem, id est, certe, omnibus hierarchicis commune est tradere sanctam lucem, scilicet gratiae, perficiendis, id est, recipientibus sacramenta. Sed haec teleta, scilicet baptismus, primum donavit mihi videre spiritualiter, et per ipsum principale, id est,

primordiale lumen ejus luciducor, id est, Iuce ducor in conspectum, id est, contuitum aliorum sacramentorum : et ideo illuminatio spiritualiter vocatur, quia primo illuminat : similiter Eucharistia communio, quia complet communionem.