EXPOSITIO TEXTUS,

C. Intellectualibus volentes, etc.

Hae, dico, pulchritudines, volentes habere, id est, requirentes in animabus nostris imagines incorruptibiles, quae sunt per virtutem conformes, intellectualibus divinis pulchritudinibus, quae sunt in essentia ejus. Ad formissimam imitationem, id est, ad pulchrum imitatum quod est Deus, figurat, id est, repraesentat ipsam, scilicet formam.

Et sicut in sensibilibus, etc. Hic ponit exemplum sensibile ad id quod dixerat quod nostrae virtutes debent intendere ad imitationem divinarum pulchritudinum quarum sunt imaginationes.

Dicit ergo, quod hoc ita est, sicut pictor semper intendit ad exemplar cujus vult imaginem effingere, et ad nihil aliud, ita facit imaginem, in qua ipsum exemplar videbitur propter perfectam imitationem, per hoc quod exemplar et imago differunt per essentiam.

Scriptor, id est, pictor, ad primam speciem exemplarem, quam scilicet intendit repraesentare per imaginem.