EXPOSITIO TEXTUS.

Littera sic legitur : Diximus, quod primo dicendum est de Eucharistia, et de ea primo quidem hoc inspiciamus sacre, id est, secundum regulas, propter quid, idest, quod est commune omnibus aliis teletis, id est, ritibus hierarchicis discrete, id est, singulariter deputatur, id est, attribuitur huic, scilicet Eucharistiae, ultra caeteras teletas, et hoc iii dum singulariter praedicatur, id est, nominatur communio ex parte ejus in quo uniuntur plures, et synaxis, id est, congregatio, ex parte eorum qui uniuntur in uno : sic dico nominatur, unaquaque sacra actione perfectiva, id est, sacramento colligente, id est, adunante in uniformem deificationem, id est, unitatem divinae similitudinis, nostras vitas, id est, actiones et affectiones nostrae vitae, partitas, id est, dispersas per diversa commutabilia dona. Et sciendum, quod partitas vitas semper vocat vitam peccati, quia dividitur secundum quod finitur diversis creaturis : si enim eis uteretur, referret ea in unum finem : et sic non esset partita vita. Et etiam unaquaque actione sacramentali donante communionem, id est, participationem donorum ipsius, et unitatem ad unum, scilicet Deum secundum quod per praedictam venitur in ipsum Deum: et hoc deiformi complicatione, id est, congregatione divisarum vitarum.

3