DUBIUM.

Circa primum, primo est dubitatio, utrum Episcopatus sit ordo? Et videtur, quod non:

1. Quia non sunt nisi septem ordines : et Episcopatus non est unus de illis : ergo non est ordo.

2. Praeterea, Secundum gradum actionum debet esse gradus ordinum, cum ordo sit pars potestatis quae determinatur ad actum : sed nullus actus potest esse nobilior, quam consecrare corpus Christi qui est actus sacerdotii : ergo non est aliquis ordo super sacerdotium : et sic Episcopatus non est ordo.

In contrarium est quod dicitur hic, et in IV Sententiarum, ubi dicit Magister,

quod " ordo Episcoporum quadripartitus

" est ".

Et dicendum est, quod si ordo dicatur sicut proprie dicitur ordo potestas spiritualis ad actus sacramentales, sic Episcopatus non est ordo distinctus a sacerdotio, quia non potest in aliquem actum superiorem quam sacerdos. Si autem dicatur ordo potestas spiritualis ad actus qui pertinent ad unum dictorum, sic Episcopatus dicetur ordo supra sacerdotium : et secundum hoc loquitur Dionysius. Et per hoc patet solutio ad totum.