DUBIUM.

Sed videtur esse falsum quod dicit, scilicet quod omnis hierarchia per omnem virtutem habet unam et eamdem actionem.

1. Diversarum enim naturarum diversa est potestas, cum potentia sit conveniens essentiae : sed hierarchia non est nisi quidam gradus potestatis : ergo hominum et Angelorum natura distantium, non est hierarchia una : ergo nec actio una hierarchiae.

2. Praeterea, in alio libro ( ) sufficienter determinavit, quae formaliter sunt angelicae hierarchiae : si autem humana et angelica haberent unam actionem, non differrent nisi materialiter, secundum

quod haec est hominum et illa Angelorum : ergo liber iste esset superfluus.

3. Praeterea, Non est una hierarchia in symbolis et in aperta visione recipere : sed hominum hierarchia est recipere in symbolis, Angelorum vero in aperta visione : ergo non est eadem hierarchia, et sic nec actio una.

4. Praeterea, Quae non sunt ejusdem divisionis, eorum non est substantia una : sed Angelica hierarchia dividitur per novem ordines, Ecclesiastica autem non, sed tantum in tres, scilicet Episcopos, Presbyteros et Diaconos, ut ipse dicet: ergo non sunt ejusdem substantiae, et sic nec actionis.

5. Ad idem, Non est una et eadem actio in statu meriti et secundum fontem beatitudinis : sed nos sumus in statu merendi, Angeli vero in sorte beatitudinis : ergo non est una actio hierarchiae nostrae et illorum.

Solutio. Dicimus, quod Angelica et humana hierarchia differunt quidem in specie, sed sunt idem in genere hierarchiae, et sic etiam habent unam actionem genere, licet non specie. Et per hoc patet solutio ad objecta : concludunt enim omnia de identitate secundum speciem.

4