EXPOSITIO TEXTUS.

Ut ais, id est, dicis, quia ad interrogationem ejus hoc scripsit, et totum librum. Immundis, id est, infidelibus : imagines, id est, species sacramentales, quae sunt figurae ducentes in spiritualia: sacras traditiones, id est, sacramenta, pro eis, scilicet pueris : alii, id est, patrini : confessiones, scilicet fidei.

Deinde assignat necessitatem ex parte ipsius Timothaei. Dicit, quod non oportet eum anxiari et curare derisionem errantium, sed debet adversum eorum insidias veritatem fidei defendere : duo observans, scilicet reverentiam ad divina, ne praesumptuose ultra ea quae nobis tradita

sunt, de divinis praesumat : et amorem salutis errantium, ut per veritatem illuminentur, ne eos negligens a reddenda ratione desistat : et ut reverentiam divinis reservet, debet hoc proponere eis quos vult instruere, quod non omnia tradita sunt nobis a Deo in scientia nostrae hierarchiae, scilicet in libris sacrae Scripturae : unde in multis nescimus reddere rationem de divinis, quas tamen Angeli sciunt, et multa etiam Angelos latent, quae soli Deo perfecte sunt cognita.

Hierarchicam, id est, quae decent hierarchiam, vel de rebus hierarchicis, angustari, id est, conturbari, in errantibus, id est, propter derisiones infidelium : sed oportet te defendere fidei veritatem adversus insidias, id est, angustias callide fictas ad subversionem fidei, prolatas ab eis, scilicet infidelibus : ita tamen quod sis timens, id est, reverentiam servans ad divina, et simul cum hoc sis diligens gratiam luciducatus eorum, id est, ut habeas gratiam ducendi eos in lucem : defendere, dico, proponentem hoc et caetera multa, de numero ignotorum : melioribus, id est angelicis essentiis, scilicet Angelis : diligenter, id est, perfecte.

21