DUBIA.

Sed videtur hoc esse falsum : quia Chrismatis usus in baptismo est sacramentale, et non de essentia sacramenti : ergo sine eo potest sacerdos operari baptismum.

Et dicendum, quod Dionysius loquitur hic de baptismo secundum maximam ejus perfectionem, vel solemnitatem, quae non est sine Chrismate. Licet baptismum consequatur quis in aqua simplici, cum forma verborum, quantum ad esse baptismi absolute : quia tamen quaedam alia

sunt de perfectione baptismi, supplentur in his in quibus omissa fuerint.

Unguento, id est, Chrismate : communionis, id est, Eucharistiae.

1. Sed videtur hoc iterum falsum. : quia sacerdos potest conficere corpus Christi in quocumque loco, etiam non consecrato.

2. Item, Quaeritur utrum oporteat observare tempus sicut et locum?

Et dicendum, quod quantum est de potestate verborum et ordinis, potest sacerdos conficere in loco non consecrato, et similiter tempore non debito, scilicet post commestionem : sed si faciat, peccat mortaliter : quia transgreditur constituta Ecclesiae. Unde de jure non potest, quia hoc possumus quod de jure possumus : et secundum hoc loquitur Dionysius. Sed extra ordinem non potest quis conficere, quia hoc a Christo donatum est solis sacerdotibus.