BALTH. CORDERII, S. J. INTERPRETATIO.

In hunc autem modum deiprincipali benignitate sancte collaudata, coopertus quidem divinus ille panis calixque benedictionis proponitur : divinissima vero salutatio sive osculum, sacrarumque tabularum mystica et supermundialis recitatio celebratur. Non enim possunt ad unum colligi, atque unius pacificae unionis participes existere, qui secum ipsi dissident. Nam si unius contemplatione atque cognitione illustrati, ad uniformem quamdam ac divinam conjunctionem redigeremur, nequaquam In divisas cupiditates dilabi nos pateremur, ex quibus istae materiales plenaeque passionum adversus aequales existunt inimicitiae. Hanc itaque, uti reor, uniformem atque indivisam vitae rationem sacra ista pacis conciliatio sancit, dum simile in simili collocat, et divina singulariaque spectacula a dividuis secernit.