BALTH. CORDERII, S. J. INTERPRETATIO.

Atque hi quidem sunt sacri ordines eorumque distributiones ac virtutes et operationes atque consecrationes : triplex modo genus ordinum initiandorum superest exponendum.

Dicimus igitur, ordines illos qui expiantur, esse turbas illas quae a sacris functionibus et consecrationibus segregantur, quarum superius mentionem fecimus : quorum alius quidem a sacris arcetur, quod adhuc a ministris ad vitalem partum verbis obstetricantibus foveatur atque efformetur ; alter vero, quod etiamnum ad eam, a qua defecit, vitae sanctimoniam adhortatoria sermonum bonorum disciplina revocetur ; alius autem, quod adhuc contrariis pavoribus ignaviter terreatur, atque potentibus eloquiis corroboretur ; alius vero, quod adhuc ab operibus perversis ad sacras actiones traducatur ; alius, quod jam traductus quidem sit, sed nondum constantiam in divinis immutabilibus que scientiis sit consecutus. Hi enim sunt ordines qui cura ministrorum et purgandi vi expiantur, quos ad hoc ministri sacris

virtutibus perficiunt ad consummate purgatos eos illuminatricem manifestissimarum sacrificationum contemplationem et communicationem transordinandos.