DIVISIO ET EXPOSITIO TEXTUS.

Hujus autem principium, etc.

In parte Ista determinat de principio hierarchiae, et dividitur in partes duas. In prima ostendit quid sit omnis hierarchiae principium : in secunda, emanationem hierarchiae ab illo principio, ibi (g 8), Dicamus itaque quomodo, etc.

Prima dividitur in duas. In prima ponit commune principium hierarchiae. In secunda ostendit secundum quam conditionem sit proprium principium hierarchiae per differentiam ab aliis rebus, quarum etiam causa est, ibi, Huic autem desiderabilis, etc.

Littera sic construitur : Diximus, quod hierarchia est omnis sacrarum ratio et hierarchiae, tam angelicae quam humanae, princirium est Trinitas quae est unus Deus, qui est fons vitae in quantum est spiritualis naturae, cujus est effundere vitam, et essentia bonitatis, scilicet causa secundum quod est bonum per essentiam, a qua est bonitas per participationem in omnibus causatis ab ipsa, ut dicit Boetius, et una causa omnium existentium, in quantum est prima, quia impossibile est plura ponere prima secundum Philosophum. Etiam ex qua, Trinitate scilicet, est, id est, provenit et esse secundum quod

est causa existentium, et bene esse et naturae in quantum est fons vitae, et gratiae in quantum est essentia bonitatis, non solum hierarchicis, sed omnibus rebus subsistentibus per suam bonitatem, quae res ad esse adduxit, ut in cap. IV Caelestis hierarchiae dictum est. Haec autem causa quae est divinissima, id est, perfectissima summitas, quia cacumen omnium rerum, in quantum est ultimus finis, et secundum quod omnes perfectiones caeterarum rerum sunt altiori modo in ipsa, trina principali beatitudine, id est, principalibus beatis, scilicet personis, quarum quaelibet principalis dicitur propter aequalitatem majestatis. Cum enim principalis beatitudo sit essentialis beatitudo, non diceret Trinitafem esse in essentia, nisi abstractum pro concreto poneretur. Haec, dico, existit unita in essentia, vere, quia secundum esse et essentiam (ad. differentiam essentiae universalis, quae secundum esse est multa, non habens veram unitatem) et hoc secundum quod est nobis incomprehensibile, scilicet ut fines ejus circumspiciamus, quamvis per fidem quoquomodo attingamus.

Huic autem, etc. Quia praedictum principium est causa communis omnium rerum, ostendit secundum quam rationem efficiatur propria causa hierarchiae.

Et dividitur in, partes duas. In prima ponit conditionem secundum quam causa communis omnium rerum, est propria hierarchiae. In secunda ponit conditiones hierarchiae, secundum quas exit a proprio principio, ibi (sig. 7), Omni autem hoc commune, etc.

Littera sic construitur : Huic autem scilicet Trinitati, est quidem desiderabilis quaedam voluntas, id est, volitum, salus rationalis naturae et essentiarum secundum nos, id est, hominum, et essentiarum super nos, scilicet Angelorum, Et dicitur hic rationale etiam secundum quod est differentia animalis, et hoc est quod dicitur I. ad Tim. II, 4 : Qui omnes homines vult salvos fieri, etc. Haec autem voluntas salutis est propria causa hierarchiae. Haec autem salus non potest aliter fieri, nisi salvatis deificatis, id est, in Deum reductis, extra quem non est salus. Deificatio autem est ei similitudo ad Deum et unitas, quantum possibile est : et similitudo refertur ad. habitum gloriae

creatum, quem quis acquirit ex conjunctione ad Deum, unitas vero refertur ad objectum beatitudinis, quod est beatitudo increata. Haec autem sunt quibus perficitur hierarchia, ut in cap. III Caelestis hierarchiae dicitur : " et ideo ista non dicit amplius : " et sic ex voluntate salutis causatur hierarchia.

7