DIVISIO ET EXPOSITIO TEXTUS.

Veni ergo, o puer bone, etc.

In parte Ista ponit intellectum ritus, quem circa communionem observari dixerat, prout supra dictum est : quia spiritualia sunt intellectus sensibilium symbolorum : et ideo pars haec dicitur theoria, id est, intellectualis speculatio, synaxeos, id est, communionis.

Dividitur autem haec pars in duas. In prima ponit theoriam ritus communionis in communi. In secunda specialius exponit significationem uniuscujusque eorum quae in hoc sacramento symbolice aguntur, ibi (sig. 9), Haec igitur (ut dixD in abditorum, etc.

Prima adhuc in duas. In prima invitat ad spiritualem interpretationem eorum quae dicta sunt. In secunda exponit in communi, ibi (sig. 8), Sacratissimi quidem.

Littera sic exponatur : Dixi, quod oportet Episcopum ascendere ad intellectuales operationes : quia ergo tu es Episcopus, o bone puer, scilicet Thimothee, quem puerum vocat propter puritatem, vel quia discipulus ejus erat, dum eum in hoc opere instruebat, veni per intellectum in deiformem veritatem, quae est figuratum exemplorum, id est, sym- bolorum quae sensibiliter per modum exempli exponunt, principalium, id est, quae decent principale sacramentum, et hoc in ordine, id est, ordinate, post imagines, id est, symbola cognita, et sacre, id est, in sensibilibus sacra quaerendo : sed dicam illud perfectis, id est, qui perficiuntur, alia translatio, " adhuc perficiendis : " quomodo symbolorum varia compositio et sacra, non subsistit eis, id est, ad utilitates eorum, sine intellectu , id est, sine cognitione spiritualium, quam supra dixit intellectum et scientiam horum, et non est apparens solummodo usque ad ea quae extra sunt, id est, sensibilia, id est, apparet non tamen sensui, sicut dico, subsistit et apparet in introductionem animarum suarum, id est, perficiendorum ad spiritualium contemplationem.

Sacratissimi quidem, etc. Hic in communi dicit theoriam eorum quae circa hoc sacramentum aguntur, et primo eorum quae aguntur ante consecrationem. Secundo, ipsius consecratae jam communionis, ibi, Divinissima autem, etc.

Littera sic exponitur : Ista non apparet solum, et hoc ad extra. Enim, id est, quia sacratissimi quidem cantus, et lectiones altorum eloquiorum, id est, ex sacra Scriptura sumptae, quae in principio denuntiant eis, scilicet perficiendis, doctrinam vitae quae est in virtute, et similiter cum his denuntiant perfectam purgationem malitiae, id est, a malitia, corrumpentis : docent enim illi cantus et lectiones fugere vitia et sequi virtutes.