DUBIUM.

Circa primum est dubium de hoc quod dicit, quod eloquia sunt essentia nostrae hierarchiae : videtur enim esse falsum.

1. Regulans enim et regulatum non sunt idem : sed nostra hierarchia regulatur sacra Scriptura, quae dicitur hic tradita a Deo eloquia,: ergo non est essentia nostrae hierarchiae a Deo tradita eloquia.

2. Praeterea, Eloquia habent relationem ad alterum quantum ad auditum : sed talem relationem non importat hierarchia : ergo non sunt idem per essentiam.

Solutio. Dicendum, quod locutio est exponenda per causam : sunt enim sacra eloquia causa essentialis nostrae hierarchiae, non per motum tantum doctrinae, quia haec insufficiens est ad. bonos mores, ut dicit Philosophus, sed etiam obligando per modum legis : anima enim non haberet nisi persuasionem, quae insufficiens est ad faciendos homines bonos. Et per hoc patet solutio ad objecta.