DUBIUM.

1. Sed videtur, quod non faciat pacem : pax enim est ad alterum, edulium autem dicit refectionem in ipso : cum igitur in hoc sacramento sit spirituale edulium, non videtur facere pacem, sed refectionem.

2. Praeterea, Non omnium sanctorum conversatio est similis : unus enim non est similis alteri, sicut cantatur de confessoribus, " Non est inventus similis " illi : " ergo videtur, quod non faciat similem conversationem.

3. Praeterea, Hoc sacramentum datur in publico, et non debet aliquis accedens repelli : ergo videtur, quod discretio sumentium non pertineat ad hoc sacramentum.

Ad primum dicendum, quod hoc sacramentum potest dupliciter considerari, aut quantum ad oblatum ipsum, et sic cum sit in forma cibi non convenit ei fa-

cere nisi refectionem spiritualem : secundum vero quod est in actu offerendi, est ejus significare et facere pacem : quare et communicatur a tota Ecclesia, et offertur pro pace, secundum quod dicitur inLeviticis multoties hostia pacifica. Ad secundum dicendum, quod licet omnes sancti non sint similes in conversatione quantum ad actus ipsos, sunt tamen similes quantum ad formam opera- tionis quae est charitas, secundum quam sunt similes etiam contraria operantes : et talis concordia significatur per hoc sacramentum unionis.

Ad tertium dicendum, quod discretio est referenda ad effectum sacramenti, qui differt in bonis, in quibus est ad augmentum gratiae, et in malis, in quibus est ad augmentum culpae.

9