DUBIUM.

1. Sed videtur, quod non debeat eum inungere : unctio enim significat habilitatem ad opus in quantum aufert rigiditatem membrorum : haec autem habilitas pertinet ad confirmationem in qua datur Spiritus sanctus ad robur operandi : ergo videtur quod baptizandus non debeat inungi.

2. Praeterea, Operari sequitur esse : sed iste nondum habet esse spirituale, cum nondum sit baptizatus : ergo non debet inungi ad habilitatem.

3. Praeterea, Quare incipit Episcopus eum inungere ?

4. Item, Quare non Inungit eum oleo infirmorum ?

5. Item, Quando inungitur ?

Et dicendum, quod olei unctio removet membrorum rigiditatem et per consequens reddit expeditum ad operandum : et sic etiam unctio confirmationis. Item, mitigat etiam dolorem corporis, et quantum ad hoc significat mitigationem fomitis, et operatur ad hoc, et sic requiritur ante baptismum, ne virtus daemonis existens in fomite impediat effectum baptismi : propter quod etiam fiunt exorcismi : Episcopus autem incipit inungere, ut ostendatur tota virtus baptismi descendere ab ipso in subditos. Ideo autem non ungit oleo infirmorum, quia illud oleum ordinatum est contra infirmitates corporales, quae causantur ex peccato, ut tales solvat : hic autem non habet talem

infirmitatem corporalem, et ideo non est inungendus hoc oleo.