DUBIUM.

1. Videtur hoc esse falsum, cum sint diversa sacramenta : diversorum autem sacramentorum diversus est effectus.

2. Praeterea, Communio non est communis omnibus hierarchicis : quia baptizati solum communicant : ergo videtur falsum quod dicit, quod sit eadem agens, Chrismati scilicet, quod fere est consummativum in omnibus.

3. Praeterea, Diversorum sacramentorum diversa est materia, materia enim propria rei non est in alia re, sed Chrisma est propria materia confirmationis : ergo videtur, quod non deberet esse usus illius in aliis sacramentis.

Et dicendum, quod non dicuntur eadem agere, quia sit idem effectus eorum, sed quia utrumque habet quamdam communem perfectionem circa illa sacramenta, quia et ordinati et baptizati in fine communicabantur et ungebantur Chrismate tamquam perfectionem ab his reciperent, licet diversimode, ut prius dictum est.

Ad secundum dicendum, quod Eucharistia non est communis omnibus tamquam sit de esse eorum, sed quia est de bene esse.

Ad tertium dicendum., quod chrisma propter balsamum, quod secundum se totum est odoriferum, significat et confert robur contra impugnantes gratiam, et etiam propterea est materia in sacramento confirmationis, in quo confertur

robur universaliter quantum ad omnia :

et ideo in omnibus aliis sacramentis potest assumi ad praestandum spiritualiter robur quantum ad aliquid, sicut in baptismo quantum ad fidem, et in ordine quantum ad dispositiones hierarchicas, et efficitur materia propria per aliquam specialem operationem.