DUBIUM.

Sed videtur, quod dilectio et actio non sint prima perficientia nostram hierarchiam, et ita non debuerunt hic poni.

1. Totum enim per modum universalis se habens, est prius naturaliter parte : sed dilectio est quaedam pars gratiae : ergo gratia prior.

2. Praeterea, Esse prius est quam operari, ut ipse post dicet : sed esse spirituale habet anima per gratiam : dilectio autem, cum sit virtus, ordinatur ad operari, et actio est operatio ipsa : ergo gratia prior est perfectio nostrae hierarchiae quam dilectio et operatio. Si dicatur, quod dilectio est prior virtus. Contra : Sicut ostendit Apostolus, ad Heb. xii, 1: Est fides sperandarum, etc, id est, fundamentum totius spiritualis aedificii: fundamentum autem est prima pars : ergo fides est prior dilectione.

3. Praeterea, Sicut ipse dicit in libro de Divinis nominibus cap. VII, fides collocat nos in veritate et veritatem in nobis : hoc autem est primum in perfectione spirituali : ergo fides et prima perfectio et non dilectio.

4. Item, Videtur quod timor, propter id quod dicitur in Psal. cx, 10 : Initium sapientiae timor Domini,

5. Item, Matth. III, 2 et IV, 17, dicitur Paenitentiam agite, et dicit Glossa, quod " prima virtus est veterem hominem per " paenitentiam divellere : " ergo non videtur dilectio prior perfectio nostrae hierarchiae.

Solutio. Dicimus, quod de ista proprietate super IV Sententiarum sufficienter notatum est: quantum tamen ad praesens pertinet, dicendum quod omnia ista aliquo modo possunt dici prima. Quatuor tamen virtutes cardinales nullo modo sunt primae in perfectione spirituali. Gratia autem est prior simpliciter in. perfectione spirituali, sicut dans esse spirituale : sed hoc esse supponitur in hierarchia, quia omnes perfectiones hierarchicae sunt superadditae ad esse spirituale : et hoc primum est quod supponit in hierarchia, et ideo de gratia non facit mentionem. Inter alia autem quae adduntur secundum rationem supra hoc esse ad perfectionem, quae est in scientia et actione, quae est essentia hierarchiae, dilectio est prior simpliciter, quia secundum substantiam et diffinitionem, cum sit forma universalis et perfectio omnium aliorum, et non e converso : forma enim prior est substantia et diffinitione, cum materia non cognoscatur nisi secundum analogiam ad formam, ut dicit Philosophus. Fides est prior secundum quid, quasi per modum temporis et generationis : quia primus motus in Deum est fidei. Timor est etiam quodammodo prior ex parte nostra secundum recessum a termino, quia timor expellit peccatum. Paenitentia vero est prior quasi immediate purgans mentem a vitiis ad inferendum virtutes, cum tamen praesupponat motum fidei et timoris. Quidam tamen dicunt, quod non est inconveniens quod fides sit prior quam dilectio, quia fides refertur ad intellectum, dilectio autem ad affectum : et sic non secundum idem sunt prius. Et per hoc patet solutio ab objecta.

2