BALTH. CORDERII, S. J. INTERPRETATIO.

Caeterum sublimiores Istae naturae ordinesque, quarum venerandam supra feci mentionem, et incorporeae sunt, et spiritalis ac supermundialis sacer illarum magistratus existit; nostrum vero cernimus, diversa ab ipsis ratione, sensibilium varietate signorum multiplicari, quibus sacrosancte ad uniformem deiformitatem pro captu nostro, et ad Deum divinamque virtutem promovemur. Istae quidem, utpote mentes, prout illis fas est intelligunt ; nos vero a sensu perceptis imaginibus ad divinas, quantum possumus, contemplationes sublevamur. Et ut vere dicam, unum quidem est, quod omnes qui deiformes sunt appetunt, ejus tamen, quod omnino unum atque idem est, non unimode participes existunt, sed prout cuilibet pro merito sortem divina trutina distribuit.

Sed quidem haec nobis in ea, quae est de Invisibilibus et sensibilibus, actione latius dicta sunt.

Nunc vero nostram hierarchiam principiumque et ejus essentiam, quantum possibile, dicere tentabo, omnium hierarchiarum principium et consummationem Jesum invocans.

Est quidem hierarchia omnis secundum adorabile nostrae sacrae traditionis, omnis subjectorum sacrorum ratio, aut universalissima hujus continuatim hierarchiae, aut hujus sacrorum consummatio.