BALTH. CORDERII, S. J. INTERPRETATIO.

Tum jam divinis rebus pontifex conjungitur, sanctisque Dei operibus laudatis, divinissima consecrat mysteria, et in adspectum ducit quae celebravit.

Quaenam porro censeamus divina in nos esse opera, deinceps pro virili exponendum est. Neque enim laudandis omnibus sufficio, imo ne clare quidem cognoscendis aliisque tradendis ; quae autem a praesidibus divino numine afflatis conformiter eloquiis laudantur ac celebrantur, eadem pro modulo nostro, sacri ordinis adspirationi implorata, proferemus.

DIVISIO ET EXPOSISIO TEXTUS.

Sic divinus sacerdos, etc.

Hic determinat de consecratione ipsa, et primo ponit ritum, secundo theoriam, ibi, Ergo esse in nos, etc.

Dicit ergo primo, quod Episcopus paratis praedictis, laudat actiones divinas, quae operantur in sacramento, dum dicit quomodo Christus hoc sacramentum instituit, et sic consecrat per verba Domini corpus et sanguinem ejus, et tandem ostendit populo dum hostiam levat. Unitur, quia per eam unimur ad Deum : divinissima, id est, corpus et sanguinem Christi, sanctificat, id est, consecrat : laudata, id est, consecrata.

Ergo esse in nos, etc. Hic ponit dictorum theoriam, ei primo dicit de quo est intentio, et facit invocationem propter sui

magnitudinem. Secundo prosequitur, ibi (sig. 23), Humanam naturam, etc.

Primo ergo dicit, quod dicendum est primo actiones divinas quae laudantur in sacrificio, et postea virtutem sacramenti, in his qui sumunt, non tamen omnes actiones divinas quae sacramento repraesentantur, est sufficiens scire aut exponere aliis, sed tantum illa quae habentur per sacram Scripturam : et ut hoc sit possibile, invocat eum a quo est omnis inspiratio hierarchica. Vel aliter primo debemus dicere divina beneficia quae sunt divinae actiones in nos, quae in hoc sacramento rememorantur, deinceps narrandum quod est ad propositum, scilicet ritus et mysterium, quanta virtus est, scilicet nobis ad talia dicenda : et causam subjungit, quia non est sufficiens omnia dicere. Ergo ex quo laudat divinas actiones, nos dicimus divinas actiones esse in nos, id est, dicemus quas divinas actiones in nos repraesentet nobis hoc sacramentum. Alia translatio, " igitur quas quidem esse ad nos, etc. "

Deinceps in sequenti parte narrandum quanta sit virtus hujus sacramenti in sumentibus ipsum. A divinis summis sacerdotibus, id est, qui tradiderunt Scripturas canonicas, vel ab ipsis sacrificantibus laudantur per memorationem, et sacrificantur per consecrationem, consequenter eloquiis, id est, secundum quod consonat sacrae Scripturae, hierarchicam inspirationem, ducem, id est, principium ejus, etc.

23