EXPOSITIO TEXTUS.

C. Manent autem, etc.

Deinde dicit : Istis exclusis, autem, id est, sed manent illi qui sunt digni adspectu et communicatione divinorum : hoc ideo dicit, quia non omnes manent ad communicandum, sed quidam ad videndum et ad adorandum corpus Christi. Vero, id est, sed alii quidem ministrorum, scilicet ostiarii, stant ad portas templi conclusas, prohibentes introitum immundis. Alii vero ministrorum operantur aliud quid, id est, aliquid proprii ordinis, sicut acolyti portantes cereos. Alii autem, scilicet diaconi, discreti, id est, probabiles in vita, vel selecti, ministr atoria dispositione, id est, ad ministrandum, vel divisi vestibus sacris ab aliis, simul cum sacerdotibus proponunt sacrum panem, consecrandum in corpus Christi, et calicem benedictionis super divinum altare, ante tamen confessa Catholica hymno logia, id est, hymno fidei Catholicae, scilicet symbolo Apostolorum, quod tunc erat tantum, ab omni plenitudine Ecclesiae, id est, a tota Ecclesia. Ideo autem in hoc tantum sacra-

mento cantatur symbolum, quia maxime de eo requiritur fides, eo quod totum est supra rationem et circa sensum. Cum quibus, scilicet sacerdotibus, divinus pontifex perficit sacram orationem, dicendo, " Per omnia saecula saeculorum, " et promittit sacram, pacem omnibus dicendo, " Per omnia saecula saeculorum : " pax Domini sit semper vobiscum. " Et salvantibus, id est, osculantibus omnibus inter se invicem, perficitur mystica praedicatio sacrorum voluminum, id est, de sacri s libris, per quam excitantur ad fidem, et devotionem sacramenti. Ideo autem pax spiritualiter in hoc sacramento datur : quia, ut dictum est , est sacramentum communionis, quae est per pacem.