DIVISIO ET EXPOSITIO TEXTUS.

A. Est autem, ut aestimo, etc.

Hic ostendit quid significet velatio Chrismatis a duodecim alis, scilicet quod per Chrisma significatur Christus, ut dictum est, et per duodecim alas significantur Seraphin, de quibus legitur Isa. VI, 2, quod stabant super thronum, sex alae uni, et sex alae alteri.

Primo ergo ponit significatum hujus velationis Chrismatis. Secundo, gratia hujus pertranseundo exponit quid significant ea quae de Seraphin in illa visione dicta sunt, ibi (sig. 10), Incorporales Seraphin, etc.

Circa primum, primodicit altitudinem ordinis Seraphin. Secundo, qualiter significetur in consecratione, ibi (sig. 9), Super nos ergo, etc.

Dicit ergo primo, quod Jesus qui est fons totius spiritualis redolentiae, propinquius influit caelestibus essentiis quam nobis, quibus per illas deferuntur spirituales emanationes, et inter eas magis manifestat et copiosius communicat lucidissimis earum, scilicet Seraphin : sed summa visio divinorum occultatur inferioribus, et distribuitur eis tantum secundum proportionem ipsarum, quod proportionale est eis de spiritualibus odoribus.

Essentiis quae sunt super nos, id est, Angelis, retributio fontalis suaveolentiae, id est, communicatio ipsius divinae bonitatis, quae est fons omnis suavitatis, scilicet communicata secundum proportionem naturae, vel meriti, est propinquior, scilicet quam nos, et adhuc magis manifestat seipsum et distribuit copiose supermanans in lucidissimum eorum, id est, inter ea, scilicet Seraphin, et in. id quod est bene habile receptivae virtutis, id est, ad recipiendum, juxta, id est, secundum intellectum, et etiam ipsa retributio multipliciter occultata in hoc lucidissime