EXPOSITIO TEXTUS.

B. Quae divinitus jubet, etc.

Quae, scilicet anagoge, jubet per modum regulae sanctis viris, divinitus, id est, ex institutione Dei, scilicet, non habere bonas et bene olentes similitudines Dei occulti, quae sunt secundum virtutem, id est, secundum proportionem et facultatem ejus qui similitatur, qui tamen non poterit simpliciter similari, manifestas in vana gloria, id est, ad vanam gloriam, sed ad gloriam Dei.

Mundae enim, etc. Hic ostendit rationem hujus praecepti.

Dicit ergo, quod gratiarum dona quae sunt in nobis, debent imitari divinas pulchritudines secundum bonitates quarum sunt imagines : sed divinae pulchritudines sunt secretae, et non ostenduntur ad sensum exterius, sed tantum interius per participationem gratiae : sic et gratiae nostrae sunt occultandae humanis oculis per fugam vanae gloriae.

Pulchritudines Dei quae scilicet sunt in essentia ejus, mundae et suaveolentes sunt secretae, etc, ex hoc quia sunt super ainmum, et ostenduntur solummodo invisibiliter.