EXPOSITIO TEXTUS.

B. Essentia enim nostrae hierarchiae, etc.

Littera sic exponitur : Diximus, quod nobis datum est per symbola. Enim, id est, quia eloquia tradita a Deo est essentia, id est, essentialis causa nostrae hiearchiae, regulando per modum doctrinae et legis. Haec autem dicimus eloquia, quaecumque donata sunt nobis in deltis, id est, pugillaribus sive tabulis de cera, et sumitur hic pro libris, agiographis, id est, sacrae Scripturae, et Theologicis, id est, in quibus divini sermones sunt scripti, et haec a nostris divinis sacris perfectoribus, id est, ab his qui in divinis perfecti, nos sancte instruendo perfecerunt, sicut Prophetae et Apostoli. Atqui, id est, certe, et, id est, etiam illa sunt sacra eloquia quaecumque nostri duces, id est, magistri, sicut fuit Ierotheus et alii sunt eruditi ab ipsis sacris viris, qui scilicet Scripturas canonicas ediderunt, immateriali doctrina : quia sicut capacioribus divinorum immaterialiter eis tradita sunt, quae aliis in vilibus signis occultantur : et minore, id est, simpliciore quodammodo jam in caelesti hierarchia,

id est, appropinquando ad modum quo accipit caelestis hierarchia immaterialiter, et eruditi, dico, ex intellectu unius, in intellectum alterius procedente doctrina, sicut ex intellectu Pauli in intellectum Ierothei, et sic deinceps : et hoc per medium quod defert intentiones unius ad alterum, verbum, dico, corporale quidem, ne credatur omnino immaterialiter accipere sicut caelestis hierarchia, immaterialius vero, quam alii recipiant, tamen duces nostri extra scripturam, eruditi sunt. Et intendit quod sacra eloquia sunt quae sancti viri scripserunt, vel quia verbis edocuerunt discipulos suos, et ipsi aliis tradiderunt secundum quod acceperunt, sicut luna illuminat in quantum habet lumen a sole.

Neque haec divini, etc. Hic ostendit quare doctrinam suam sacri viri symbolis tradiderunt : et dividitur in duas, secundum quod duas rationes assignat. Secunda incipit ibi(sig. 9). Non propter immundos solum, etc, Littera sic exponitur : Neque, id est non divini summi sacerdotes, id est, sacra dantes, non non tradiderunt haec, scilicet sacra eloquia, invisibilibus non velatis, id est, tradendo invisibilia sine velamine figurarum : sed tradiderunt in sacris symbolis, et haec in commune sacrificii, id est, communicanda aliis, qui per haec efficerentur sacri. Et hoc ideo : enim, id est, quia non omnis homo est mundus : sed quia sunt porci et canes quibus non licet dare sanctum et margaritas, ut dicitur Math. VII, 6 : neque omnium hominum est scientia, qui sciant spiritualia honore congruo revereri, ut eloquia aiunt .

Igitur necessario, ne sancta derideantur, primi duces nostrae hierarchiae, qui scilicet nobis sacra eloquia tradiderunt, ipsi per se repleti divino dono ex superessentiali deitate, et, id est, etiam Deum postquam ipsi receperunt, missi sunt ex divina bonitate, nostram salutem providente, praeire nos exemplis et doctrinis in idipsum, scilicet divinum donum. Ipsi vero duces copiose amantes, et nos, quorum salutem operabantur, et Deum cujus gloriam quaerebant, tamquam dii per similitudinem donorum et consortium potestatis, operatores per ministerium, reductionis, quantum ad conjunctionem, et deificationis, quantum ad assimilationem perfectam ad finem eorum qui post se sunt, quibus scilicet a Deo praepositi sunt, tradiderunt nobis non proprio motu, sed secundum sacras leges, doctrinis in libris quos ediderunt, et non scriptis quantum ad hos quos ore tantum docuerunt, ex quibus iterum transmissa est doctrina in alios, secundum quod ab eis acceperunt. Tradiderunt, dico supercaelestia sensibilibus imaginibus, id est, symbolis, et tradiderunt id quod in se est connexum, id est, simplex et unum, scilicet spiritualia, et varietate et multitudine symbolorum : et tradiderunt divina in rebus humanis, et immaterialia in rebus materialibus, et superessentialia his rebus quae secundum nos sunt: et tradiderunt hoc modo non solum propter immundos, id est, infideles vel peccatores, quibus non est fas beatitudinis tangere symbola, id est, species sensibiles sacramentorum : sed quia nostra hierarchia est quaedam hierarchia symbolica, scilicet symbolis tradita. Quod quidem dixi, quia sunt proportionata nobis ipsis, qui per sensibilia nati sumus accipere. Hierarchia, dico, desiderans, id est, requirens sensibilia in nostram reductionem diviniorem ipsis sensibilibus, quae est ex eis, scilicet sensibilibus, ad invisibilia.