A. DUBIA.

Sunt igitur hic duo dubia.

Primo, Utrum ex hoc sacramento sit perfectio in aliis?

Secundo, Utrum alia habeant perfectionem ex se ?

Circa primum sic proceditur.

1. Videtur enim, quod ex hoc sacramento non sit perfectio in aliis. Perfectum enim trahit virtutem a perficiente : sed baptismus et alia sacramenta sine hoc habent suam virtutem : ergo hoc non est perfectio aliorum.

2. Praeterea, Alia sacramenta non dependent ab ipso, sed istud magis ab aliis, quia non consecratur nisi per virtutem ordinis, et non datur nisi baptizato : ergo hoc magis habet perfectionem ab aliis.

3. Item, Nihil est perfectum nisi in agere : non potest autem aliquid agere nisi sit perfectum in esse : sed quodlibet sacramentum est perfectum in sua actione : ergo quodlibet habet perfectionem in se.

4. Praeterea, Augustinus dicit, quod " virtus divina perfecta est: " ergo quodlibet sacramentum in se perfectum est.

Et dicendum, quod quodlibet sacramentum est perfectum quantum ad suam operationem essentialem et virtutem, sed quantum ad communicationem ad finem ultimum recipiunt perfectionem ab hoc sacramento, quod continet in seipso unum quod est ultimus finis, scilicet Christum : et quantum ad significationem etiam per se totam communionem dicit, ut prius dictum est: hoc autem non est in aliis sacramentis, et ideo perfectionem quae est in communicatione ad finem ultimum, recipiunt ab hoc s acramento. Et per hoc patet solutio ad totum.