DUBIUM.

1. Sed videtur, quod non debeat duci ad Episcopum : quia quilibet sacerdos potest baptizare, et etiam pater et mater in necessitate.

2. Praeterea, In baptismo Spiritus sanctus datur tantum ad esse, ut prius dictum est, sed in confirmatione datur ad robur : et ita confirmatio majus aliquid est: minora autem a minoribus sunt danda : cum igitur confirmatio datur a solis Episcopis, baptismus debet dari ab aliis sacerdotibus.

3. Praeterea, Christus, sicut Joan.IV, 2, dicitur neminem baptizavit, sed discipuli ejus. : Episcopi autem sunt loco Christi in Ecclesia, et minores sacerdotes loco discipulorum: ergo ipsi debent baptizare et non Episcopi.

Solutio. Dicendum ad primum, quod sicut dictum est, hic intendit tradere ritum baptismi secundum suam maximam solemnitatem : et haec est secundum quod confertur ab Episcopis, a quibus primo descendit gratia dispensandi sacramenta in alios, sicut unguentum in capite quod descendit in barbam, barbam Aaron, et deinde in oram vestimenti ejus : et non intendit, quod non possit dari ab aliis inferioribus.

Ad secundum dicendum, quod baptismus potest dari a minoribus, sed non propter minoritatem, cum sit janua et fundamentum sacramentorum, sed propter necessitatem, ne contingeret aliquem fraudari vita aeterna ex defectu baptismi propter absentiam Episcopi, maxime in parvis.

Ad tertium dicendum, quod Christus non baptizavit, dispensatione duplici, scilicet ut ostenderet omnes baptizare interius qui nullum baptizavit exterius, et ne derogaret baptismo Joannis qui tunc baptizavit, quamvis ipse Apostolos baptizaverit.

6