BALTH. CORDERII, S. J. INTERPRETATIO.

Verum ordo ministrorum seu diaconorum est, qui expiat et dissimilia discernit, antequam ad sacerdotum sacra veniant ; accedentes etiam lustrat, ut eos a contrariis immunes reddat, atque sacrorum mysteriorum spectaculo et communione dignos. Itaque in sacra Dei regeneratione diaconi eum. qui ad illam accedit, antiqua veste exuunt atque discalceant, et ad occidentem abrenuntiandi causa sistunt, rursusque traducunt ad orientem (sunt enim purgantis ordinis atque virtutis) hortantes eos qui accedunt, ut prioris vitae indumenta penitus deponant ; errorisque pristini tenebris patefactis docent eos ut obscuris rebus ablegatis, sese transferant ad ea quae illuminant. Diaconorum itaque ordo est expiatorius, ad praeclara sacerdotum sacra ducens eos qui expiati sunt, atque expiat imperfectos, quos etiam fovet purgantibus eloquiorum illustrationibus atque doctrinis ; et praeterea profanos a sacerdotibus arcet, propter quod pontificio instituto sacris quoque foribus praeficitur, ut significetur, eorum qui ad sacra veniunt accessum omnimo-

C. Propter quod et sanctis eam statuit portis hierarchica legislatio, ad sacra provenientium introitum in perfectissimis purgationibus insinuans, et ad sanctas eorum suspectiones et communicationes accessum purgativis virtutibus tradens, et per eas eos non impollutos accipiens.