EXPOSITIO TEXTUS.

Divinissima autem, etc.

Deinde dicit theoriam ipsius communionis. Divinissima autem communio unius et ejusdem et panis, scilicet corporis Christi, et traditio pacifica, id est, pacem faciens, per traditionem hujus sacramenti fit pax in nobis : vel traditio pacifica, quia scilicet sibi in caena pacem dant fideles in Ecclesia, promulgat, id est, ostendit eis, scilicet perfectis, similem divinam conversationem tamquam similiter edentibus, id est, ex hoc quod similiter edunt corpus Christi in sacramento. Et ducit in memoriam divinissimam caenam, scilicet Christi cum discipulis, et principale, id est, primo institutum symbolum perfectorum, id est, signum sacramentale, quo perficiuntur. Et docens facile, id est, apte simul cum hoc, et deiformiter cum hoc quomodo ipsa assumptio in divina, quae fit per sumptionem Eucharistiae, vera, quia ipse Deus sumitur, non aliqua gratia, ut in aliis sacramentis : non enim corporaliter, sed juxta habitum, id est, secundum cognitionem et affectum, donat communionem divinorum ipsis advenientibus ad se, ad similitudinem eorum, quia peccantibus est in condemnationem, justis in sanctificationem, et hoc dicit,

juxta quod et ipse conditor symbolorum, scilicet Jesus, sanctissime partitur, id est, segregat ab aliis concaenantem ei, id est, Judam, non sancte et unimode cum aliis , unde post buccellam intrat in eum satanas, sed Joannes Evangelista recubuit super pectus. Alia translatio sic habet : " Quemadmodum et ipse signorum " creator segregat justissime, non sancte " et uno victu cum ipso sancta coena-" tum. " Sic igitur communio tria significat, concordiam vitae, caenam Christi, et discretionem sumentium.