DIVISIO ET EXPOSITIO TEXTUS.

Sed euge, quoniam hujus, etc,

Habitum est in praecedenti capitulo de baptismo qui est actio hierarchiae circa intrantes : hic incipit determinare de actionibus hierarchicis quae sunt circa progredientes : et dividitur in duas : in prima enim agitur de perfectionibus hierarchicis quae perficiunt in via, in secunda de iis quae perficiunt quantum ad terminum, viae scilicet ad quam pervenitur per praedictas sanctificationes, ibi (cap. V, sig. 1), Haec quidem divinissimi unguenti, etc.

Prima dividitur in partes duas secundum quod per duo potest impediri processus in spirituali, scilicet per defectum perducentis, contra quod ordinatur Eucharistia, quae est spiritualis refectio animae, unde et viaticum dicitur, de qua agit in prima parte.Potest etiam impediri per impugnationem aliquorum, et circa hoc est confirmatio in qua datur Spiritus, scilicet ad robur resistendi omnibus adversantibus, de qua determinat in secunda parte secundum quatuor casus, ibi (cap. IV), Tanta sanctissimae synaxeos, etc. Et est ratio apparens ordinis : quia primum per se juvat processum in via : secundum per accidens, removendo im- pedimentum, quamvis ponat rationem ex parte dignitatis.

Praesens autem capitulum dividitur in tres partes. Primo enim ostendit qui perficiantur, vel quae efficiantur per hoc sacramentum. Secundo ponit ritum sive mysterium., ibi (g 5), Summus quidem sacerdos, etc. Tertio assignat significationem vel theoriam mysterii, ibi (sig. 7), Veni ergo, o puer boue.

Prima pars dividitur in tres. Primo enim ponit ordinem hujus sacramenti ad sequentia et rationem ordinis. In secunda ostendit propositum, scilicet quid efficiatur in hoc sacramento, ibi (sig. 2), Et primo quidem hoc sacre. In tertia continuat se ad sequentia, ibi (sig. 4), Haec autem dicentes.

Prima dividitur in duas. In prima continuat se ad praecedentia ponens ordinem ad sequentia. In secunda, rationem ordinis assignat, ibi (sig. 1), Etenim est secundum nostrum gloriosum, etc.

Littera sic exponitur : Sed euge, adverbium hortandi vel exsultandi : est enim in dicendis materia spiritualis gaudii. Quoniam quidem erat commemoratio hujus, scilicet Eucharistiae in immediate praedictis, non est mihi justum trans currenti, id est, breviter sacramenta tractanti propter humilitatem hoc dicit quasi sit insufficiens ad theorias eorum perfecte explicandas) ritum laudare, id est, cum reverentia et laude tradere, quid, id est, aliquid, aliud de numero hierarchicorum, scilicet mysteriorum, ante eam, scilicet Eucharistiam.

Etenim secundum gloriosum magistrum nostrum, scilicet Ierotheum qui virtuosus magister fuit, Eucharistia est hostia hostiarum, id est, inter omnia quibus homines Deo sacrificantur,dignius : unde alia translatio habet, " ieleta teleta- " rum, " sicut dicitur " virgo virginum : " et ideo oportet ascendere de symbolis divino spiritu ducentem sacramenta contemplationis ejus, scilicet Eucharistiae, sacre scribens, neutrius generis, id est, eum qui sacre scribit : unde alia littera habet, " scribentem, " scilicet exponentem eam, scilicet Eucharistiam ante alias hostias, ex scientia divina, non humana, quantum ad primum a quo fluit, et hierarchica, quantum ad materiam, et hoc juxta sacra eloquia.