EXPOSITIO TEXTUS.

Divinum vero, etc.

Hic dicit, quod cantatur " Alleluia " in consecratione Chrismatis secundum antiquum morem.

Dicit ergo, quod ((Alleluia)) interpretatur laus Dei, vel laudate Deum, et ideo cantatur hoc canticum in omnibus hie-

rarchicis, et praecipue in hoc, quod est consummatio aliorum, ut doceamur in omnibus et de omnibus actionibus divinis laudare Deum.

Melodema, id est, canticum, inspirationis Prophetarum, id est, quod Prophetis inspiratum est. Tob. xiii, 22 : Per vicos ejus Alleluia cantabitur. Et similiter in titulis aliquorum psalmorum.

Declarare hoc, id est, laus Dei, materialiter.

Igitur non inconveniens est recordari hymno logiam Prophetarum Deo motam, id est, a Deo traditam, scilicet " Alleluia, " in varia compositione symbolorum totius sanctae theophaniae, id est, cujuslibet spiritualis illuminationis, et creationis, id est, interioris operationis, sicut dicitur in Psal. l, 12 : Cor mundum crea, etc.

Descriptae, etc. id est, figuratae, sacre, id est, decentibus et sacris symbolis.

Docet, scilicet hymno logia, caste, propter munditiam, divinitus, propter deiformitatem quae debet esse in iis qui laudant Deum.