DUBIUM.

1. Sed videtur, quod non conficiatur secundum quantitatem ex rebus bene odoriferis : inveniuntur enim plura magis odorifera quam ea quae ponuntur in confectione Chrismatis.

2. Praeterea, Oleum quod ponitur in ejus confectione, non est multum odoriferum : ergo Chrisma non conficitur ex rebus copiose odoriferis.

3. Iterum, Quaeritur quare conficiatur ex balsamo et oleo ?

Dicendum ad. primum, quod sicut dicit Philosophus in libro de Plantis, " Quaedam plantae sunt odoriferae secundum totum, id est, secundum radices, stipitem, et folia, verbi gratia ut balsamus : " et ideo dicitur copiose redolens, quod secundum totum est bonae olentiae quamvis forte alia sint vehementioris odoris.

Praeterea balsamus conservat a putrefactione : et ideo ponitur in Chrismate propter odorem bonae famae ad alios, et propter incorruptionem a concupiscentiis quantum ad seipsum.

Oleum vero non propter hoc ponitur : et ideo non oportet quod sit nimis redolens : sed ponitur ad perfectionem conscientiae, secundum enim quod ungendo lenit, praestat medicamentum circa praecedentia peccati vulnera : secundum vero quod lucet, confert splendorem virtutum, et competit characteri qui imprimitur in confirmatione, quod est lumen quoddam : secundum vero quod pascit, competit refectioni affectus qui est in summo bono. Et per hoc patet solutio ad alia.

7